افضل ماسك للبشرة الدهنية | الطين الهندي | سعودي بلوجر

السلام عليكم ورحمة الله وبركاته 

كيفكم يا حلوين ؟؟ ان شاء الله كويسين

حبيت اتكلم عن منتج كنت راح اتكلم عنو السنه اللي فاتت لكن سحبت على المدونه ما اعرف ايش حصلي صراحه ههههههه 

نجم الماسكات طين الشفاء الهندي

indian healing clay mask 

هذا الماسك تكلموا عنو كثثثيييير بلوقر 

لكن انا بتكلم عنه بصفتي جربته مدة سنتين مو يوم ولا يومين ولا اسبوع ولا شهر او شهرين لاااا سنتييييين !!!

و هذي العبوه الثانيه عندي ، مبدئياً انا بشرتي دهنيه فيها حبوب و اثار يعني دمااااااار الله لا يوريكم ..

قبل سنتين بززززبط بداية ما اخذت هذا المنتج بعد ما سمعت مدح نهى نبيل في السناب 

وبحثت في قوقل عنو وقريت تجارب الناس 

ملخص اللي سمعته وقريته :

• يقلل من ظهور حب الشباب .
•  الاثار ويمحيها . 
• ينظف البشره من الشوائب و الرؤوس السوداء. 
• يشد البشره و يفتحها . 
• يوازن دهون البشره .
• يصغر المسامات .

1. ما حسيت انه يقلل ظهور حبوب الشباب لكن يجفف الحبوب مايخليها دهنيه و مع الاستمرار بتروح بطريقه اسرع * لكن مو متأكده للامانه لان عندي حساسيه و راح اتكلم بشكل اعمق عن الموضوع المره الجايه  *
2. يخفف الاثار لكن مع ( الاستمرار ) بنسبه بسيطه يعني الاثار الخفيفه الى المتوسطه الاستمرار بالماسك راح يمحوها لك بإذن الله و الغامقه راح يخفف من لونها بس راح تطووول معاك النتيجه . 
3. صح ينظف البشره من اول استخدام تنظييييف عميييق ، و الرؤوس السودا و البيضاء مع الاستمرار راح تخف الين تروح نهائي لكن مع الاهمال راح ترجع . 
4. الشد يبان من اول استخدام و مع الوقت راح تحسين ان بشرتك دايم مشدود لكن الاهمال راح يخفي النتيجه ، بنسبه لتفتيح ما يبان من اول مره اقل شي ثلاث شهور . 
5. موازنه الدهون من اول استخدام يبان ، مع الاستمرار تقل الدهون لدرجه تحتاجين كريم مرطب يصير الوجه جااااااااااااااف ومقشر هوه حلو التقشير لان راح يقشر الاثار و تختفي نهائي لكن انا ما استحملت الجفاف و التقشير و اضطريت اوقفه الين تتحسن بشرتي و ارجع ثاني ولكن هذا خطأ مني المفروض استمر لان يعتبر مثل العلاج
6. تصغير المسام يبان من ثالث رابع استخدام و راح تتسكر المسام نهائي 

طريقة الاستخدام : 

 هو يجي مثل البودره من الداخل تاخذي بنسبه متساويه منه مع خل التفاح اذا كانت بشرتك دهنيه واذا جافه مويا ورد او زبادي وتخليه الى ما ينشف جزئياً راح يشد البشره بششششكل فظيع وتستخدميه مرتين بالشهر او مره كل اسبوع هذا المتداول بين البنات لكن طريقتي مختلفه

بديهياً مستحيل احط بوجهي خل مع طين لان راح يكون المفعول قوي جداً وهو لحاله ماشاءالله مايحتاج لكن بالنهاية كل وحده و تحمل بشرتها استخدم معاه مويا ورد 

مرات الاستخدام : 

اول شهر جربته كنت استخدمه مرتين بالاسبوع بعدين بديت مره كل يومين و بعدها خليتها يوم بعد يوم الين ما تعودت بشرتي عليه .

تقييمي للمنتج : 10 من 10

السعر : 
454g نفس حجم اللي عندي بـ 30 ريال
و 908g بـ 47 ريال 
الحجم اللي عندي يكفي سنه كامله وشوي
هذي اسعار اي هيرب ما ادري عن المواقع الثانيه لكن اللي اعرفه ان اي هيرب منتجاتها الارخص اونلاين 

موقع الشراء :

اي هيرب | iherb 

امازون | amazon

او

عند التاجرات 

وفيه محلات قليله بجده و الرياض يبيعوه لكن مو فاكره اساميهم لان ما اتعاملت الا مع اي هيرب لشراء المنتج 

ملاحظه : 

يسبب حكه بالبشره و احمرار و جفاف اللي بشرتها جافه او حساسه لا تستخدمه . 

وبس كذا خلصت الرفيو ان شاء الله يكون شامل و مفيد للكل 

هذا كل ما عندي فإن أحسنت فمن الله، وإن أخطأت فمن نفسي والشيطان . 

قريباً راح انزل بوست عن معاناتي من الحبوب و الاثار و بعض الحلول !

تسعدني اضافتكم لي في : 

 Instagram : @why.ji 

snapchat : tahanir11